Nvidia süni intellekt çipləri üçün yeni texnologiya satışa çıxarır

Nvidia süni intellekt çiplərinin ünsiyyətini sürətləndirəcək texnologiyanı satışa çıxarır

TAYPEY, 19 may (Reuters) – Nvidia (NVDA.O) çipdən-çipə məlumat ötürülməsini sürətləndirmək üçün istifadə ediləcək texnologiyanı digər şirkətlərə satmağı planlaşdırır. Bu addım süni intellekt alətlərinin qurulması və istifadəsini daha da səmərəli hala gətirmək məqsədi daşıyır.

Şirkət yeni NVLink texnologiyasının NVLink Fusion adlı versiyasını təqdim edib. Bu texnologiya vasitəsilə digər çip istehsalçıları güclü və fərdi süni intellekt sistemləri yarada biləcəklər.

Marvell Technology və MediaTek artıq NVLink Fusion texnologiyasını öz çip layihələrində istifadə etməyə hazırlaşır.

Nvidia NVLink texnologiyasını illər əvvəl hazırlayıb və bu sistem böyük məlumatların çiplər arasında ötürülməsində istifadə olunur. Məsələn, GB200 sistemində bu texnologiya iki Blackwell qrafik prosessorunu Grace prosessoru ilə birləşdirir.

CEO Jensen Huang bu xəbəri Computex AI sərgisindən öncə Taypey Musiqi Mərkəzində açıqlayıb. Həmçinin, Huang Nvidia-nın Taypeyin şimal ətrafında yerləşəcək yeni qərargah planlarını da elan edib.

O, çıxışında Nvidia-nın süni intellekt çipləri və sistemləri üzərində keçmişdən bu günə qədər gördüyü işləri və dəstəkləyici proqram təminatını ətraflı izah edib. Vurğulayıb ki, əvvəllər təqdimatlarının 90%-i qrafik çiplərə həsr olunurdusa, artıq süni intellekt əsas diqqət mərkəzindədir.

Nvidia artıq oyun çipləri istehsalçısından süni intellekt texnologiyasına rəhbərlik edən şirkətə çevrilib.

Reuters-in məlumatına görə, şirkət həmçinin Microsoft-un Windows əməliyyat sistemində işləyəcək və Arm Holdings texnologiyasından istifadə edəcək CPU-lar hazırlayır.

Ötən il Computex sərgisində Huang Tayvanda "Jensanity" dalğası yaratmışdı – media və ictimaiyyət CEO-nu addım-addım izləyirdi.

Mart ayında keçirilən illik inkişaf konfransında Huang Nvidia-nın süni intellekt tətbiqlərinin işlədilməsinə necə fokuslanacağını açıqlayıb. O, Blackwell Ultra daxil olmaqla bir neçə yeni nəsil süni intellekt çiplərini təqdim edib. Rubin çiplərindən sonra isə Feynman prosessorları 2028-ci ildə istifadəyə veriləcək.

Şirkət həmçinin AI tədqiqatçıları üçün nəzərdə tutulmuş masaüstü versiya – DGX Spark kompüterini təqdim edib. Huang bildirib ki, bu cihaz artıq tam istehsalat mərhələsindədir və bir neçə həftəyə hazır olacaq.

1,400 iştirakçının gözlənildiyi Computex sərgisi Asiyada çip sənayesinin ilk böyük tədbiri olacaq. Bu tədbir ABŞ Prezidenti Donald Trampın istehsalı ölkəyə qaytarmaq üçün tarif təhdidlərindən sonra xüsusi önəm daşıyır.

Texnologiyadan xəbərdar olmaq üçün Telsat Xəbərləri izləməyi unutmayın.